MUGARRIAK

Herria biltzen duten harriak

Mugarriak udalerri bakoitzaren mugak non dauden adierazteko jartzen diren harri bereziak dira, sarritan mugakide diren udalerri bakoitzaren izenaren iniziala grabatuta izaten dutena. Zizurkilgo Udalerrian guztira 100 mugarritik gora ditugu. Askotan ez dira oso errazak aurkitzeko eta maiz leku zailetan topa daitezke: erreka-zuloetan, otez jositako tontorretan…

 

Mugarriak, era askotakoak izaten dira, baina beti harri bereziak eta nabarmenak. Hainbatetan, mugarri zaharrak galdu edo aurkitzen ez, eta arduradunek mugarri berriak jarri behar izan dituzte. Hori gertatu da, esaterako, Usurbil eta Zizurkil bereizten dituen Ziortzako langan.

Mugarri zahar asko gurutze bat zizelkatuta duten harriak izaten dira, Zalberro parajean aurki daitekeen bezalakoan. Oso ohikoa da, baita ere, mugarriaren gainean mugalerroa adieraztea eta udalerri mugakide bakoitzaren inizialak zizelkatzea.

Baditugu Zizurkilen hiru herri mugakideren mugarriak ere: Zizurkilen, Aiaren eta Usurbilen lur eremuen muga adierazteko Andatzaren magalean jarri zutena. Baita lau udalerri mugatzen dituen mugarria ere: Laumugarrieta. Zizurkilgo hegoaldeen dagoen puntuan lekututa, bat egiten dute leku hartan Zizurkilek, Asteasuk, Villabonak eta Anoetak.

Beste hainbat lekutan berez mugarria egon beharko luke baina mendi-pistak zabaldu direlako, baso-lanak egin zutelako, bertan zerbait eraiki delako… gaur jatorrizko mugarri haren arrastoa galduta dago. Guk puntu horiek ere adierazi nahi izan ditugu, mugarria ez egon arren, mugagune izaten jarraitzen baitute.

Hori da Hernandorena Kultur Elkarteak burutu nahi izan duen ekimena. Proiektu aberats bezain korapilotsua, Yoseba Alonso eta Javi Castro adituen laguntzarekin eta Zizurkilgo Udalaren babesarekin lortu duguna.